媒體報導 : 恬寧居「心寧廚房」計劃總結暨頒獎典禮 - 蘋果日報 - 即時新聞

2014/03/08

日期：2014年3月8日 (星期六)
資料來源：蘋果日報 - 即時新聞 - 娛樂蘋台
標題：恬寧居「心寧廚房」計劃總結暨頒獎典禮
參考網址：請按此

被指是回流返港發展嘅張慧儀，今日到馬鞍山出席3.8婦女節「心靈廚房」計劃頒奬禮，張慧儀嘅養子都有出席。張慧儀話一直都有帶小朋友嚟呢個會嘅活動，上次烹飪比賽，囝囝都煮咗香葱炒蛋，平時都有教佢廚藝。慧儀話依家係暫時喺香港定居，因為囝囝喺香港讀書。

講到有報道指慧儀喺深水埗開舖，仲親力親為落舖頭幫手，佢話：「係呀，因為引進咗馬來西亞嘅食品返嚟，有時間都會落去幫手，不過主力係同事幫手，我都希望如果自己落場嘅話，可以賣多幾包。」

慧儀話原本都諗住今日帶啲舖頭食品嚟做禮物，不過銷情太好，已經賣晒。問佢係咪投資好多？慧儀表示：「唔係好多，係小生意，比起廣西嘅參茸生意係小生意。」佢話廣西嘅生意交俾員工搞，係過年、中秋先會忙啲，所以依家可以喺香港搞生意。

講到今日馬來西亞航空一架由吉隆坡飛往北京嘅客機，起飛後兩個鐘與控制塔失去聯絡一事，來自大馬嘅慧儀亦憂心忡忡：「我都好關心呢件事，不停開住電視睇，但未知最新消息，咁多個鐘都冇消息，唔敢太樂觀。」慧儀話以前返北京，都會搭馬航，亦係搭呢個時間嘅馬航，聽到好心噏。